PEXE LES MANES ye un poemariu de calter y xeitu patrimonialista y anfibiu, que se sostién en cuatro encontos principales, a saber: la ETNOGRAFÍA de la mar, el MEDIU MARÍN, la INFANCIA, y L'HOME (ésti últimu na so doble condición de suxetu sexoafectivu y de suxetu social).

La colección de poemes de PEXE LES MANES resultó ganadora en 2021 del XXX PREMIU TEODORO CUESTA DE POESÍA que'l Conceyu Mieres concede añalmente a la obra poética más destacada de cada convocatoria espublizada, tando'l xuráu pa esa ocasión formáu por Esther Prieto, Xabiero Cayarga, Xuan Bello, Pablo Rodríguez y Daniel Blanco.

El poemariu ye profundamente heteroxeniu no formal y diversu y rebesosu no temáticu, y dibuxa un conxuntu emocional y paisaxísticu variáu ya inesperáu a la manera caprichosa y cambiante de los distintos fondos y colores del océanu y la oriella.

Tola esperiencia de xunta la mar ta presente nesti viaxe... Dende una fiesta de patrona en SÁBADU DE GUÍA a la defensa de la muyer migrante en CORMORANA VIEYA. Dende los mieos infantiles de NENU DE MAREA a la denuncia del deterioru'l Mediu en NUN QUEDEN PULGUES. Dende'l desgarru amorosu de LOS MUERTOS • ATIENDI AMOR a la invocación de lo trescendente en L'HOME TRESCENDENTAL...