Piensa nesi momentu previu al soníu. En toles muyeres que rompieron esi silenciu cola voz, cola percursión, col glayíu, col cantu. Somos munches les que podemos dir a hombros de les muyeres que nos preceden. 

Ser quien a cantar ye un cantu dende la música, la imaxen, la voz y la palabra n’homenaxe a les asturianes qu’ocuparon l’espaciu públicu porque nun dexaron de ser quien yeren, porque fueron quien a cantar de munches maneres: na llucha sindical, nel activismu, nes artes, na política. 

La música Sara Friera, la fotógrafa y realizadora audiovisual Daniela Cohen, la percusionista Jimena Menéndez y la poeta Sofía Castañón componen esti espectáculu al traviés de la xenealoxía, la espresión y la toma de conciencia de la voz propia.

Ser quien a cantar ye un espectáculu poéticu, visual y musical onde la reflesión feminista d’ocupación del espaciu públicu (políticu, artísicu, rellacional) vencéyase coles voces de muyeres asturianes qu’abrieron camín dende los sos espacios: Mari Luz Cristóbal Caunedo, Anita Sirgo, Nené Losada Rico o Yolanda Huergo son dalgunes de les referentes que suenen dientro d’esta propuesta.

Sara Friera: Voz, viola y guitarra eléctrica

Jimena Menéndez: Pandero, pandereta y caja china

Daniela Cohen: visuales

Sofía Castañón: Voz y poemas